ສຳນັກຂ່າວຕ່າງປະເທດລາຍງານວ່າ ທ່ານ ສະເຕຟານ ບັນເຊລ ຜູ້ບໍລິຫານບໍລິສັດໂມເດີນາເປີດເຜີຍວ່າ ວັກຊີນທີ່ມີຢູ່ໃນປັດຈຸບັນ ຄາດວ່າ ຈະມີປະສິດທິພາບຫຼຸດລົງໃນການຕ້ານກັບໄວຣັສກາຍພັນ ໂອໄມຄຣອນ ພ້ອມເຕືອນວ່າ ບັນດາບໍລິສັດຜູ້ພັດທະນາວັກຊີນຕ້ອງໃຊ້ເວລາອີກຫຼາຍເດືອນ ຈຶ່ງສາມາດຜະລິດວັກຊີນປ້ອງກັນສາຍພັນດັ່ງກ່າວໄດ້.
ຜູ້ບໍລິຫານຂອງໂມເດີນາ ກ່າວວ່າ: ໄວຣັສສາຍພັນໂອໄມຄຣອນ ມີການກາຍພັນຫຼາຍຕຳແໜ່ງທີ່ໜາມໂປຣຕິນ (Spike Protein) ແລະ ການທີ່ສາຍພັນດັ່ງກ່າວແຜ່ລະບາດຢ່າງໄວວາໃນທະວີບອາຟຣິກກາ ເຮັດໃຫ້ຕ້ອງປັບປຸງສູດວັກຊີນໃນຕົ້ນປີໜ້າ.
ຂ້ອຍຄິດວ່າ ປະສິດທິພາບຂອງວັກຊີນໃນການປ້ອງກັນສາຍພັນ ໂອໄມຄຣອນນັ້ນ ຈະບໍ່ເທົ່າກັບສາຍພັນເດວຕ້າ ແຕ່ຈະຫຼຸດລົງໜ້ອຍຫຼາຍສ່ຳໃດນັ້ນ ຍັງບໍ່ທັນຮູ້ລະອຽດ ຍັງລໍຖ້າຂໍ້ມູນການວິໄຈ ແຕ່ນັກວິທະຍາສາດບອກວ່າ ປະສິດທິພາບບໍ່ຄ່ອຍດີປານໃດ, ຜູ້ບໍລິຫານໂມເດີນາ ກ່າວ.
