ຣັດເຊຍເຕືອນ ການຂວ້ຳບາດນ້ຳມັນ-ແກັສ ຂອງຣັດເຊຍ ອາດເຮັດໃຫ້ຕະຫຼາດພະລັງງານໂລກຫຼົ້ມ

0
213

ສຳນັກຂ່າວຕ່າງປະເທດລາຍງານວ່າ ທ່ານ ອາເລັກຊານເດີ ໂນວັກ ຮອງນາຍົກລັດຖະມົນຕີຂອງຣັດເຊຍ ອອກມາເຕືອນວ່າ: ການທີ່ຫຼາຍປະເທດອອກມາດຕະການຫ້າມນຳເຂົ້ານ້ຳມັນ ແລະ ແກັສທຳມະຊາດຈາກຣັດເຊຍ ອາດຈະເຮັດໃຫ້ຕະຫຼາດພະລັງງານຂອງໂລກຫຼົ້ມກໍເປັນໄດ້.


ຮອງນາຍົກລັດຖະມົນຕີຣັດເຊຍ ກ່າວອີກວ່າ: ຣັດເຊຍເປັນຜູ້ສົ່ງອອກນ້ຳມັນ ແລະ ແກັສທຳມະຊາດລາຍໃຫຍ່ຂອງໂລກ ໂດຍກວມເອົາ 40% ຂອງຕະຫຼາດໂລກ, ຫາກຖືກຂວ້ຳບາດ ຣັດເຊຍຈະບໍ່ສາມາດສົ່ງອອກພະລັງງານໄດ້ ແລະ ໃນທີ່ສຸດອາດຈະເຮັດໃຫ້ຕະຫຼາດພະລັງງານໂລກຫຼົ້ມກໍເປັນໄດ້.
ສະຫະພາບເອີຣົບ ເຊິ່ງກຳລັງປະເຊີນກັບການເພີ່ມຂຶ້ນຂອງລາຄາ ແລະ ຂາດແຄນພະລັງງານ ເມື່ອປະເຊີນກັບແຮງກົດດັນຈາກສະຫະລັດອາເມຣກາ ໄດ້ຢຸດຕິທໍ່ສົ່ງແກັສ ນ໊ອດ ສະຕຣີມ 2 (Nord Stream 2) ເຮັດໃຫ້ໃນຊ່ວງປີຜ່ານມາລາຄາໄຟຟ້າໃນເອີຣົບເພີ່ມຂຶ້ນ 10 ເທົ່າ, ໃນຂະນະທີ່ລາຄາແກັສເພີ່ມຂຶ້ນ 5 ເທົ່າ ເຊິ່ງມີບາງຊ່ວງລາຄາແກັສສູງເຖິງ 4.000 ໂດລາຕໍ່ 1.000 ແມັດກ້ອນ ແຕ່ຈຸດນັ້ນອາດຈະບໍ່ແມ່ນລາຄາສູງທີ່ສຸດຂອງລາຄາພະລັງງານໃນເອີຣົບ, ຮອງນາຍົກລັດຖະມົນຕີ ຣັດເຊຍ ກ່າວ.