ອົງການກາແດງແຫ່ງຊາດລາວ ໄດ້ມອບລົດ ກູໄພສຸກເສີນໃຫ້ 4 ຄັນ ໃຫ້ 4 ແຂວງຂອງລາວ

0
122

ອົງການກາແດງ 4 ແຂວງເປົ້າໝາຍ ໄດ້ຮັບລົດກູ້ໄພສຸກເສີນ

ຂປລ. ໃນວັນທີ 25 ມີນາ 2022 ນີ້, ອົງການກາແດງແຫ່ງຊາດລາວ ໄດ້ມອບລົດ ກູໄພສຸກເສີນ (ອຳບູນລັງ) ໃຫ້ກາແດງແຂວງ ອັດຕະປື, ສາລະວັນ, ຫລວງພະບາງ ແລະ ແຂວງບໍ່ແກ້ວ ແຂວງລະ 1 ຄັນ ເພື່ອນໍາເຂົ້າໃນວຽກງານກູ້ຊີບ-ກູ້ໄພ ຢູ່ພາຍໃນແຂວງ ແນໃສ່ຊ່ວຍເຫລືອຄົນເຈັບໃຫ້ທັນກັບເວລາ, ຫລຸດຜ່ອນການບາດເຈັບ, ພິການ ແລະ ເສຍຊີວິດ ໃນເວລາເກີດອຸບັດເຫດ, ທັງເປັນການປະກອບສ່ວນຊ່ວຍ ເຫລືອສັງຄົມ ຕາງໜ້າມອບໂດຍ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ຮັບໂດຍຜູ້ຕາງໜ້າຈາກກາແດງ 4 ແຂວງດັ່ງກ່າວ ໂດຍມີພາກສ່ວນກ່ຽວຂ້ອງ ເຂົ້າຮ່ວມ ເປັນສັກຂີພິຍານ.

ທ່ານ ພູທອນ ເມືອງປາກ ກ່າວວ່າ: ວຽກງານກູ້ຊີບກູ້ໄພແມ່ນໜຶ່ງ ໃນ 9 ໜ້າວຽກຈຸດສຸມຂອງອົງການກາແດງລາວ ທີ່ຈະຕ້ອງໄດ້ປະກອບສ່ວນໃນວຽກງານນີ້, ໃຫ້ເພີ່ມຂຶ້ນ ເພື່ອໃຫ້ມີຄວາມທັນສະໄໝ, ວ່ອງໄວ ແລະ ບໍລິການປະຊາຊົນໃຫ້ທັນເວລາ ໂດຍບໍ່ຮຽກຮ້ອງສິ່ງຕອບແທນ ແລະ ໃນອະນາຄົດອົງການກາແດງແຫ່ງຊາດລາວ ຈະໄດ້ຂະຫຍາຍຕາໜ່າງ ໜ່ວຍກູ້ຊີບກູ້ໄພ 1625 ອົງການກາແດງລາວ ລົງໄປສູ່ບັນດາແຂວງທີ່ມີຄວາມພ້ອມ ເພື່ອໃຫ້ການຊ່ວຍເຫລືອປະຊາຊົນ.

ສຳລັບ ລົດທີ່ນຳມາມອບໃນຄັ້ງນີ້, ໄດ້ຮັບການສະໜັບສະໜູນຈາກ ມູນນິທິອາ ສາຄົນທີ່ງົດງາມ ສ.ເກົາຫລີ ລວມມູນຄ່າ 150.000 ໂດລາສະຫະລັດ ເຊິ່ງບາງແຂວງ ແມ່ນໄດ້ເປັນຄັ້ງທຳອິດ ທີ່ຈະໄດ້ນຳໄປເປີດໜ່ວຍກູ້ໄພ ຊ່ວຍເຫລືອສຸກເສີນພາຍໃນແຂວງ ກໍຄື ແຂວງ ສາລະວັນ ແລະ ແຂວງ ອັດຕະປື.

ອີງຕາມສະຖິຕິໃນ 3 ເດືອນຕົ້ນປີ 2022 ນີ້, ໜ່ວຍງານກູ້ໄພ 1625 ອົງການກາແດງແຫ່ງຊາດລາວ ໃນຂອບເຂດທົ່ວປະເທດ ເປັນຕົ້ນ ກາແດງແຂວງຫລວງພະບາງ, ບໍ່ແກ້ວ, ໄຊຍະບູລີ, ວຽງຈັນ, ນະຄອນຫລວງວຽງຈັນ ແລະ ຄຳມ່ວນ ໄດ້ເຄື່ອນໄຫວອຸບັດເຫດທັງໝົດ 640 ຄັ້ງ, ມີຜູ້ໄດ້ຮັບບາດເຈັບ 690 ຄົນ, ຍິງ 253 ຄົນ, ເສຍຊີວິດ 68 ຄົນ, ຍິງ 16 ຄົນ ເຊິ່ງສະແດງໃຫ້ເຫັນວ່າມີຕົວເລກທີ່ສູງພໍສົມຄວນ, ສະນັ້ນ ຕາມກົດໝາຍຂອງອົງການກາແດງມາດຕາທີ 13 ວ່າດ້ວຍວຽກງານການກູ້ໄພສຸກເສີນ ແລະ ອີງໃສ່ແຜນຍຸດຖະສາດອົງການກາແດງແຫ່ງຊາດລາວ ໃນປີ 2022–2030 ວ່າດ້ວຍການກູ້ໄພສຸກເສີນ ແມ່ນການຊ່ວຍເຫລືອອັນຮີບດ່ວນ ເພື່ອກອບກູ້ເອົາຜູ້ເຄາະຮ້າຍ ຈາກໄພທຳມະຊາດ ແລະ ມະນຸດສ້າງຂຶ້ນ ເຊັ່ນ: ອຸບັດເຫດທາງຖະໜົນ, ທາງອາກາດ, ທາງນ້ຳ, ທາງອຸທົກກະໄພ, ອັກຄີໄພ, ດິນເຈື່ອນ, ຕຶກຖະຫລົ່ມ, ແຜ່ນດິນໄຫວ ແລະ ພະຍາດລະບາດ.