ພະນັກງານ-ນັກຮົບເຫລົ່າຮົບປ້ອງກັນອາກາດ ສຳເລັດຊຸດອົບຮົມ-ຫັດແອບນຳໃຊ້ ປືນ 12,7 ມມ

0
164

ຂປລ. ວັນທີ 1 ເມສາ 2022 ນີ້, ຂະແໜງປ້ອງກັນອາກາດ ພະແນກເສນາທິການກອງພັນໃຫຍ່ 502 ທີ່ຂຶ້ນກັບກອງພົນທີ 5 ປິດຊຸດອົບຮົມ-ຫັດແອບ ໄລຍະສັ້ນ ກ່ຽວກັບການນຳໃຊ້ ປືນ 12,7 ມມ ໃຫ້ພະນັກງານ-ນັກຮົບເຫລົ່າຮົບປ້ອງກັນອາກາດ ໂດຍການເປັນປະທານຂອງ ສະຫາຍ ພັນໂທ ຈິດຕະກອນ ພຸດທະວົງ ຫົວໜ້າພະແນກເສນາທິການກອງພັນໃຫຍ່ 502 ແລະ ພາກສ່ວນກ່ຽວຂ້ອງ ເຂົ້າຮ່ວມ.


ສະຫາຍ ພັນຕີ ບຸນກ້ວາງ ຟອງຄໍາແດງ ຫົວໜ້າຂະແໜງປ້ອງກັນອາກາດ ພະແນກເສນາທິການ ກອງພັນໃຫຍ່ 502 ໄດ້ສະຫລຸບຕີລາຄາຄືນຜົນຂອງການອົບຮົມ-ຫັດແອບໄລຍະສັ້ນ ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ໃນໄລຍະຜ່ານມາ ເຊິ່ງເນື້ອໃນທີ່ນໍາມາອົບຮົມ-ຫັດແອບ ລວມມີ: ທິດສະດີລວມກ່ຽວກັບປືນ12,7 ມມ, ຄຸນນະພາບສູ້ຮົບຂອງປືນ, ສະມັດຕະພາບການປະກອບສ້າງຂອງປືນ, ວິທີມ້າງປະກອບປືນ, ຄຸນຄ່າ ແລະ ການປະກອບສ້າງຂອງຫົວລູກປືນ, ຫລັກການບົວລະບັດຮັກສາ ແລະ ການນໍາໃຊ້ລູກປືນ 12,7 ມມ.

ຜ່ານການອົບຮົມ-ຫັດແອບ ເຫັນວ່າ ແຕ່ລະສະຫາຍ ໄດ້ເປັນເຈົ້າການ ແລະ ມີຄວາມຮັບຜິດຊອບສູງ, ອົດທົນຜ່ານຜ່າອຸປະສັກຂໍ້ຫຍຸ້ງຍາກໄປໄດ້ດ້ວຍດີ ແລະ ພ້ອມກັນຍາດເອົາບົດຮຽນ, ທັງພາກທິດສະດີ-ຫລັກການ ແລະ ພາກປະຕິບັດຕົວຈິງ, ມີຄວາມຊໍານິຊໍານານ, ຄ່ອງແຄ້ວ ແລະ ຫ້າວຫັນ ໃນການປະຕິບັດໜ້າທີ່ວຽກງານ.


ໂອກາດນີ້, ສະຫາຍ ພັນໂທ ຈິດຕະກອນ ພຸດທະວົງ ກໍໄດ້ຮຽກຮ້ອງໃຫ້ຄະນະພັກ-ຄະນະບັນຊາແຕ່ລະຂັ້ນ, ນັກຝຶກອົບຮົມແຕ່ລະສະຫາຍ ຈົ່ງພ້ອມກັນເອົາໃຈໃສ່ ກໍາເອົາບັນດາເນື້ອໃນບົດຮຽນ ໃນການຝຶກອົບຮົມໃນຄັ້ງນີ້, ທັງພາກທິດສະດີ ແລະ ຫລັກ ການ ນໍາໄປໝູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນ ເພື່ອພ້ອມກັນສໍາເລັດໜ້າ ທີ່ການເມືອງ ຢູ່ໃນທ່າກຽມພ້ອມ ຕາມການຈັດຕັ້ງຂັ້ນເທິງມອບໝາຍໃຫ້.