ແຂວງສະຫວັນນະເຂດ ຈັດພິທີແຫ່ ຮູບປັ້ນຫລໍ່ ພໍ່ກະດວດ ໄປປະດິດສະຖານ ທີ່ອະນຸສາວະລີ

0
299

ແຂວງສະຫວັນນະເຂດ ຈັດພິທີແຫ່ ຮູບປັ້ນຫລໍ່ ພໍ່ກະດວດ ໄປປະດິດສະຖານ ທີ່ອະນຸສາວະລີ

ຂປລ. ແຫລ່ງຂ່າວຈາກ ວິທະຍຸກະຈາຍສຽງ ແຂວງສະຫວັນນະເຂດ ໃຫ້ຮູ້ວ່າ: ພາຍຫລັງທີ່ຈັດພິທີແຫ່ ຮູບປັ້ນຫລໍ່ ພໍ່ກະດວດ ມາຈາກນະຄອນຫລວງວຽງຈັນ ມາຮອດແຂວງສະຫວັນນະເຂດໃນຕອນແລງ ຂອງວັນທີ 2 ມີນາ 2022 ແລະ ພັກເຊົາ ຢູ່ທີ່ເດີ່ນຫ້ອງວ່າການປົກຄອງແຂວງ ເປັນເວລາ 1 ຄືນ, ມາໃນຕອນເຊົ້າວັນທີ 3 ເມສາ ກໍໄດ້ຈັດພິທີແຫ່ ຮູບປັ້ນຫລໍ່ ຂອງພໍ່ກະດວດ ອອກຈາກຫ້ອງວ່າການ ປົກຄອງແຂວງ ເພື່ອນໍາໄປປະດິດສະຖານໄວ້ ທີ່ອະນຸສາວະລີຂອງເພິ່ນ ຢູ່ວົງວຽນຕໍ່ໜ້າໂຮງໝໍແຂວງສະຫວັນນະເຂດ ຢ່າງເປັນທາງການ ດ້ວຍບັນຍາກາດ ອັນຄຶກຄື້ນ ໂດຍມີພຣະເຖຣາ ນຸເຖຣະ, ມີ ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ພາກສ່ວນກ່ຽວຂ້ອງ ພ້ອມດ້ວຍມວນຊົນເຂົ້າຮ່ວມ.

ໃນພິທີ ທ່ານ ບຸນສະໜອງ ສີຫາລາດ ຫົວໜ້າກົມວິຈິດສິນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວມອບໂຄງການ ອານຸສາວະລີຮູບຈຳລອງພໍ່ກະດວດຢ່າງເປັນທາງການວ່າ: ການກໍ່ສ້າງອານຸສາວະລີຮູບຈຳລອງພໍ່ກະດວດ ເປັນການຈາ ລຶກບຸນຄຸນ, ຄຸນງາມຄວາມດີໃນການຕໍ່ສູ້ກັບລັດທິລ່າເມືອງຂຶ້ນ ເພິ່ນແມ່ນບັນພະບຸລຸດຜູ້ໜຶ່ງ ທີ່ມີນ້ຳໃຈຮັກຊາດ, ຮັກບ້ານເກີດເມືອງນອນ, ມີນ້ຳໃຈເສຍສະລະຢ່າງສູງສົ່ງ, ບໍ່ຍອມຈຳ ນົນຕໍ່ສັດຕູ, ພໍ່ກະດວດເພິ່ນບໍ່ມັກຢູ່ໃຕ້ອຳນາດຂອງຝຣັ່ງ ເພິ່ນເຫັນປະເທດຊາດຖືກຮຸກຮານ ຢ່າງໂຫດຮ້າຍປ່າເຖື່ອນ ປະຊາຊົນຖືກກົດຂີ່ຂູດຮີດ, ຖືກຈັບກຸມຄຸມຂັງທໍລະມານ ຢ່າງບໍ່ມີຄວາມເປັນທຳ ຍ້ອນສາເຫດດັ່ງກ່າວນັ້ນ ເພິ່ນຈຶ່ງໄດ້ເຕົ້າໂຮມຄວາມສາມັກຄີ, ນຳພາປະຊາ ຊົນລຸກຮືຂຶ້ນຕໍ່ສູ້ກັບພວກລ່າເມືອງຂຶ້ນຢ່າງອົງອາດກ້າຫານ ນັ້ນແມ່ນເຫດການປະຫວັດສາດທີ່ພວກເຮົາຄົນຮຸ່ນຫລັງ ຕ້ອງຈາລຶກຄຸນງາມຄວາມດີໃນການຕໍ່ສູ້ກັບພວກລ່າເມືອງຂຶ້ນ ເຖິງ ວ່າການຕໍ່ສູ້ຈະບໍ່ໄດ້ຮັບໄຊຊະນະກໍ່ຕາມ.

ທ່ານ ນາງ ຫລິງທອງ ແສງຕາວັນ ຮອງເຈົ້າແຂວງສະຫວັນນະເຂດ ກໍໄດ້ມີຄຳເຫັນວ່າ: ພໍ່ກະດວດ ເປັນຄົນມີວິຊາອາຄົມປິ່ນປົວຄົນເຈັບປ່ວຍໄດ້, ເພິ່ນຈຶ່ງໄດ້ເດີນທາງໄປຫລາຍແຫ່ງ, ແຕ່ໄປບ່ອນໃດກໍເຫັນແຕ່ປະຊາຊົນຖືກກົດຂີ່ຂູດຮີດ ດ້ວຍການເສຍສວຍ ແລະ ເປັນຂ້ອຍຂ້າຝຣັ່ງ ນັບມື້ໜັກໜ່ວງຂຶ້ນເລື້ອຍໆ ເພິ່ນຈຶ່ງຊອກທຸກວິທີທາງເພື່ອປຸກລະ ດົມປະຊາຊົນລຸກຂຶ້ນຕໍ່ສູ້ຕ້ານການກົດຂີ່ຂູດຮີດ ໃນສະໄໜລາວຕົກເປັນຫົວເມືອງຂຶ້ນຂອງສັດຕູຕ່າງດ້າວທີ່ເຂົ້າມາຮຸກຮານ; ພໍ່ກະດວດ ແມ່ນນັກຕໍ່ສູ້ທີ່ພິລະອາດຫານ, ແມ່ນຜູ້ໜຶ່ງທີ່ມີນໍ້າໃຈຮັກຊາດ ຮັກບ້ານເກີດເມືອງນອນ ມີນໍ້າໃຈເສຍສະຫລະຢ່າງສູງສົ່ງ ບໍ່ຍອມຈໍານົນຕໍ່ສັດຕູ. ນີ້ແມ່ນເຫດການດ້ານປະຫວັດສາດທີ່ພວກເຮົາຄົນ ຕ້ອງຈາລຶກຄຸນງາມຄວາມດີໃນວິລະກຳອັນລໍ້າເລີດຂອງເພີ່ນໄວ້. ດັ່ງນັ້ນ, ຈຶ່ງເກີດມີໂຄງການສ້າງອະນຸສາວະລີ ຮູບປັ້ນພໍ່ກະດວດຂຶ້ນ.